இந்திய அரிசி மீதும் டிரம்பின் குறிவைப்பா? பாஸ்மதி செய்த தவறு என்ன?

எப்போதும் வினோதமான கருத்துகளால் சர்ச்சையை ஏற்படுத்திக் கொண்டே இருப்பவர் டொனால்ட் டிரம்ப். இப்போது, அவரது கவனம் இந்திய அரிசி ஏற்றுமதியில் விழுந்துள்ளது.

உலகின் மிகப் பெரிய அரிசி உற்பத்தியாளர் இந்தியாதான். உலக அரிசி ஏற்றுமதியின் 30% இந்தியாவில் இருந்து வருகிறது. ஆனாலும், அமெரிக்க விவசாயப் பிரச்சினைகள் குறித்து பேசும் போது, இந்தியா அமெரிக்க சந்தையில் “அரிசியை கொட்டுகிறது” (Dumping) என்று டிரம்ப் கூறியுள்ளார்.

அமெரிக்காவும் அரிசி உற்பத்தியில் பின்தங்கிய நாடு அல்ல. 7.5 மில்லியன் டன் அரிசி ஆண்டுதோறும் உற்பத்தி செய்கிறது. அதில் 3 மில்லியன் டன் ஏற்றுமதி செய்கிறது. அதே வேளையில், 1.6 மில்லியன் டன் அரிசியை இறக்குமதி செய்கிறது. ஏன்? அமெரிக்காவில் வாழும் இந்தியர்கள் மற்றும் ஆசிய உணவு சந்தை காரணமாக பாஸ்மதி அரிசி, தாய்லாந்தின் மணமுள்ள ஜாஸ்மின் அரிசி போன்றவை அங்கு தேவைப்படுகின்றன.

இந்தியாவின் பாஸ்மதி ஏற்றுமதி 66.65 லட்சம் டன். இதில் அமெரிக்கா வாங்குவது வெறும் 2.74 லட்சம் டன் — அதாவது 4% மட்டுமே. பாஸ்மதி அல்லாத அரிசியில் அமெரிக்காவின் பங்கு அதைவிட மிகச் சிறியது — 61,342 டன்கள். இந்தியா அமெரிக்காவுக்கு ஏற்றுமதி செய்யும் அரிசியின் மொத்த மதிப்பு 337 மில்லியன் டாலர் மட்டுமே. இது இந்தியாவின் மொத்த ஏற்றுமதியில் மிகச் சிறிய பங்காகும்.

இந்தியாவின் அரிசி உற்பத்தி கணிசமாக உயர்ந்துள்ளது. 2024–25ஆம் ஆண்டில் 150 மில்லியன் டன் அரிசி உற்பத்தி செய்யப்பட்டுள்ளது — இது உலக உற்பத்தியின் 28%. சீனா 145.28 மில்லியன் டன் உற்பத்தி செய்து இரண்டாவது இடத்தில் உள்ளது. இந்தியாவில் அரசு வழங்கும் உறுதியான கொள்முதல் கொள்கையும் உற்பத்தி அதிகரிக்க காரணம்.

இந்திய அரிசியின் முக்கிய வாங்குபவர்கள் யார்?

• பாஸ்மதி அரிசி : சவுதி அரேபியா முதன்மை வாங்குபவர் — அமெரிக்காவைப் போலல்லாமல் நான்கு மடங்கு அதிகம் வாங்குகிறது. ஈராக், ஈரான், ஐக்கிய அரபு எமிரேட்ஸ் ஆகிய நாடுகளும் முக்கிய வாடிக்கையாளர்கள்.

• பாஸ்மதி அல்லாத அரிசி : பெனின், கினியா, கோட் டி ஐவரி போன்ற ஏழை நாடுகளே அதிகம் வாங்குகின்றன. அமெரிக்காவின் இறக்குமதி அளவு லைபீரியா, சியரா லியோன் போன்ற சிறிய சந்தைகளுக்கு சமமாக உள்ளது.

இப்போது, இந்த கட்டுரையின் முதல் வரியை மீண்டும் படியுங்கள் — “பாஸ்மதி செய்த பாவம் என்ன?” என்று கேட்கத்தான் தோன்றுகிறது!

Summary :

Trump alleges India is dumping rice in the US, but data shows America imports only a small share of Indian rice, while India dominates global exports.