இந்தியாவின் முதல் தனியார் தங்க சுரங்கம் – ஆந்திராவில் அமைய வருகிறது! இனி தங்கம் விலை குறையுமா?

இந்தியாவின் முதல் தனியார் தங்க சுரங்கம் ஆந்திரா மாநிலம் கர்னூல் மாவட்டம் ஜொன்னகிரியில் அமைக்கப்படும் என்று அறிவிக்கப்பட்டுள்ளது. கடந்த இரண்டு ஆண்டுகளாக மேற்கொள்ளப்பட்ட ஆய்வுகள் வெற்றிகரமாக முடிவடைந்ததை தொடர்ந்து, ஜியோமைசூர் மற்றும் டெக்கான் கோல்ட்மைன்ஸ் நிறுவனங்கள் இணைந்து விரைவில் தங்கம் வெட்டும் பணிகளை தொடங்க உள்ளன.

இந்தியாவில் தங்க உற்பத்தி – புதிய மாற்றம்!

இந்தியா உலக அளவில் தங்கத்தை அதிகம் பயன்படுத்தும் நாடுகளில் ஒன்றாகும். ஆனால், நாட்டின் தங்கத் தேவையின் பெரும்பகுதியை இறக்குமதியின் மூலமாகவே பூர்த்தி செய்யும் நிலை உள்ளது. கர்நாடகா உள்ளிட்ட சில பகுதிகளில் அரசு கட்டுப்பாட்டிலுள்ள தங்க சுரங்கங்களில் வெட்டுதல் நடைபெறுகிறது. இதுவரை தங்கச் சுரங்கங்களின் உரிமை முழுவதுமாக அரசு நிறுவனங்களுக்கே இருந்தது.

இதற்கிடையில், இந்தியாவில் முதல்முறையாக தனியார் தங்கச் சுரங்கம் உருவாகவுள்ளது. ஜொன்னகிரி பகுதியில் அதிகளவில் தங்கம் இருப்பது கண்டுபிடிக்கப்பட்டதைத் தொடர்ந்து, தனியார் நிறுவனங்களுக்கு சுரங்க உரிமம் வழங்கப்பட்டுள்ளது.

தங்கச் சுரங்கத்தின் வரலாறு – ஆய்வுகளின் தொடக்கம்

1994-ம் ஆண்டு, இந்திய புவியியல் ஆய்வு மையம் (GSI) கர்னூல் பகுதியில் தங்கம் இருப்பதை கண்டுபிடித்தது. முதல் கட்ட ஆய்வுகள் நடந்து கடந்த 2005-ம் ஆண்டு மைனிங் பாலிசி மாற்றம் செய்யப்பட்ட பிறகு, தனியார் நிறுவனங்களுக்கும் வாய்ப்பு வழங்கப்பட்டது.ஜியோமைசூர் சர்வீசஸ் லிமிடெட் நிறுவனம் டாக்டர் மாதிரி ஹனுமா பிரசாத் தலைமையில், ஜொன்னகிரி பகுதியில் ஆய்வுகளை மேற்கொண்டது. அதன் பின்னர், டெக்கான் கோல்ட்மைன்ஸ் நிறுவனம் 40% பங்குகளை வாங்கி, 750 ஏக்கர் நிலத்தை சொந்தமாகவும், 1,500 ஏக்கர் நிலத்தை குத்தகையாகவும் எடுத்து 2021-ல் ஆய்வுகளை தொடங்கியது.

தங்க உற்பத்தி எப்போது தொடங்கும்?

இந்த பகுதியில் 30,000 ஆழ்துளைக் கிணறுகள் மூலம் ஆய்வுகள் மேற்கொள்ளப்பட்டு, பொதுமக்களின் கருத்து கேட்பு மற்றும் சுற்றுச்சூழல் அனுமதிகள் கிடைத்தவுடன், மூன்று மாதங்களுக்குள் தங்கம் வெட்டும் பணிகள் தொடங்கப்படும்.நிறுவனத்தின் கணிப்புப்படி, வருடத்திற்கு குறைந்தபட்சம் 750 கிலோ தங்கம் உற்பத்தி செய்ய வாய்ப்பு உள்ளது.

இன்னும் தங்கம் விலை குறையுமா?

தற்போது, இந்தியா ஆண்டுக்கு 700 டன் தங்கம் இறக்குமதி செய்கிறது. ஆனால், இந்த புதிய சுரங்கம் ஒரு ஆண்டுக்கு 750 கிலோ தங்கம் மட்டுமே வழங்கும். எனவே, இது தங்கம் இறக்குமதி செலவை சிறிதளவு குறைத்தாலும், தங்கம் விலையை குறைக்கும் அளவுக்கு பெரிதாக தாக்கம் செலுத்தாது.

தனியார் தங்கச் சுரங்கம் – இந்தியா எப்போது தங்கம் இறக்குமதியில் இருந்து விடுபடும்?

இந்த புதிய முயற்சி இந்தியாவில் தனியார் தங்க உற்பத்திக்கு ஒரு புதிய தொடக்கமாகும். இன்னும் பல தங்கச் சுரங்கங்கள் உருவாகி உற்பத்தி அளவு அதிகரித்தால், இந்தியாவின் தங்க இறக்குமதி சார்பு குறையும். ஆனால், தற்போதைக்கு, தங்க விலையில் பெரிய மாற்றம் ஏற்பட வாய்ப்பு இல்லை.