0
0
சென்னை: தமிழக முதல்வர் எம்.கே. ஸ்டாலின், “இளைய தலைமுறை என்னை ‘அப்பா’ என அழைப்பது எனக்கு பெரும் மகிழ்ச்சியளிக்கிறது. அதே நேரத்தில் என் பொறுப்பையும் அதிகரிக்கிறது” என்று உணர்ச்சி வெளிப்படுத்தினார். ‘உங்களில் ஒருவன்’ நிகழ்ச்சியில் கலந்துகொண்டு, பல்வேறு முக்கியமான கேள்விகளுக்கு பதிலளித்த அவர், மத்திய பட்ஜெட்டில் தமிழ்நாடு புறக்கணிக்கப்பட்டுள்ளது என்று கடும் கண்டனம் தெரிவித்தார்.
“அப்பா” என்று அழைப்பது பெரும் மகிழ்ச்சி
நிகழ்ச்சியில் பேசிய முதல்வர் ஸ்டாலின், “தலைவர், முதல்வர் என அழைத்த அனைவரும் இப்போது என்னை ‘அப்பா’ என அழைக்கிறார்கள். இது எனக்கு பெரும் மகிழ்ச்சியளிக்கிறது. அப்பா என்ற உறவு எப்போதும் மாறாததாக இருக்கும். இது எனக்கு மேலும் பொறுப்பை உணர்த்துகிறது. தமிழ்நாட்டுக்கு இன்னும் நான் நிறைய செய்ய வேண்டும் என்பதை இது நினைவூட்டுகிறது” என்றார்.
“மத்திய பட்ஜெட்டில் தமிழ்நாடு முழுமையாக புறக்கணிக்கப்பட்டது”
மத்திய பட்ஜெட்டில் தமிழ்நாட்டுக்கு உரிய நிதி ஒதுக்கப்படாததை கடுமையாக விமர்சித்த அவர், “கடந்த சில ஆண்டுகளாகவே மத்திய அரசு தமிழ்நாட்டிற்கு தேவையான நிதியை வழங்க மறுக்கிறது. மத்திய பட்ஜெட்டில் ‘தமிழ்நாடு’ என்ற பெயரே இடம்பிடிக்கவில்லை. ஆனால், அனைத்து தரவுகளிலும் தமிழ்நாடு சிறப்பாக செயல்படுகிறது என்று மத்திய அரசு அறிக்கைகள் வெளியிடுகிறது. ஆனால் நிதி வழங்க மறுக்கிறது” என்றார்.
“நாம் உரிமை கேட்பதே அற்ப சிந்தனை என்கிறார்கள்”
மத்திய அரசை தொடர்ந்து எதிர்த்து போராட வேண்டிய சூழல் ஏற்பட்டுள்ளதாக கூறிய முதல்வர், “மாநில அரசு நிதியை வைத்து மட்டுமே திட்டங்களை செயல்படுத்துங்கள் என மத்திய அரசு கூறுகிறது. ஆனால், கூடுதல் நிதி இல்லாமல் எப்படி முன்னேற்றத்தை சாதிக்க முடியும்? கல்விக்கான நிதியைக் கூட குறைத்துவிட்டார்கள். இது தமிழகத்தை வஞ்சிப்பது போன்ற செயலாக உள்ளது” என்று குற்றம் சாட்டினார்.
பெண்களின் கல்விக்காக சிறப்பு திட்டங்கள்
மாணவர்களுக்கான கல்வி திட்டங்களை விரிவாக விளக்கிய அவர், “கல்விதான் யாராலும் திருட முடியாத சொத்து. கல்வி ஒருவரின் தலைமுறையையே மாற்றக்கூடிய சக்தி உடையது. அதனால்தான் காலை உணவு திட்டம், இல்லம் தேடி கல்வி, எண்ணும் எழுத்தும், நான் முதல்வன், தமிழ்ப் புதல்வன் ஆகிய திட்டங்களை செயல்படுத்தி வருகிறோம். பெண்களின் கல்விக்காக மேலும் சிறப்பான திட்டங்களை செயல்படுத்துவோம்” என்று உறுதியளித்தார்.
“கூட்டணியில் கருத்து வேறுபாடு இருக்கலாம், ஆனால் உறவு உறுதியாக உள்ளது”
கூட்டணி கட்சிகளுக்குள் கருத்து வேறுபாடு இருப்பதாக வெளியான தகவல்களை மறுத்து, “ஒவ்வொரு குடும்பத்திலும், வேலை செய்யும் இடங்களிலும் கருத்து வேறுபாடுகள் இருக்கும். ஆனால், அது ஜனநாயகத்தின் அடையாளம். 2009 முதல் நாம் ஒருங்கிணைந்து பாஜகவுக்கு எதிராக போராடி வருகிறோம். இந்தியா முழுவதும், பாஜகவுக்கு எதிராக சிறப்பாக செயல்படும் கூட்டணி திமுக தலைமையிலான கூட்டணிதான்” என்றார்.
“எடப்பாடி பழனிசாமியின் பேச்சு பாஜகவின் டப்பிங் டயலாக்!”
டெல்லி தேர்தல் தோல்வியை “இந்தியா கூட்டணிக்கு சம்மட்டி அடி” என்று எடப்பாடி பழனிசாமி கூறியது குறித்து பதிலளித்த முதல்வர், “எடப்பாடி பழனிசாமியின் பேச்சை பார்க்கும்போது, அது பாஜகவின் அதிகாரப்பூர்வ அறிக்கையை போலவே இருக்கிறது. அவர் சொல்வது எல்லாம் பாஜகவின் டப்பிங் டயலாக் மாதிரியே உள்ளது” என்று விமர்சித்தார்.
“தமிழ்நாட்டுக்காக இன்னும் அதிகம் செய்யவேண்டும் என்பதற்காகவே இந்த உறவு எனக்கு மேலும் பொறுப்பை அதிகரிக்கிறது” என்று கூறிய முதல்வர் ஸ்டாலின், மத்திய அரசின் நடவடிக்கைகள் மீது கடும் கண்டனம் தெரிவித்தார்.
