0
0
புதுச்சேரி: மத்திய இணை அமைச்சர் எல். முருகன், புதுச்சேரியில் நடைபெற்ற செய்தியாளர் சந்திப்பில் கோபமடைந்து, “நான் தமிழ்நாடு ஸ்டைலில் பேசினால் அது நல்லா இருக்காது” என்று கூறி, திடீரென சந்திப்பை முடித்து விட்டு கிளம்பியதால் சிறிது பரபரப்பு ஏற்பட்டது.
மத்திய பட்ஜெட் குறித்த விளக்கம்
புதுச்சேரியில் செய்தியாளர்களை சந்தித்த மத்திய இணை அமைச்சர் எல். முருகன்,
“புதுச்சேரிக்கு மத்திய உள்துறை அமைச்சகம் ரூ.3,432 கோடி நேரடி பட்ஜெட் ஒதுக்கீடு செய்துள்ளது. ஜிப்மருக்கு மட்டும் ரூ.1,450 கோடி ஒதுக்கப்பட்டுள்ளது. இதில் ரூ.150 கோடி உட்கட்டமைப்பை மேம்படுத்த தரப்படும்.
விவசாயிகள் கிசான் கடன் உச்ச வரம்பு ரூ.5 லட்சமாக உயர்த்தப்பட்டுள்ளது, இது புதுச்சேரியில் 16,000 விவசாயிகளுக்கு பயன்படும்.
குடிநீர் மேலாண்மைக்காக ரூ.186 கோடி ஒதுக்கப்பட்டுள்ளது. 12 லட்சம் ரூபாய் வருமான வரிக்கு உள்படாத வரம்பாக நிர்ணயிக்கப்பட்டுள்ளது.”
என கூறினார்.
“2014க்கு முன்பாக தமிழக ரயில்வேக்கு மிக குறைவான ரூ.800 கோடி மட்டும் ஒதுக்கப்பட்டிருந்தது. ஆனால் அதன்பிறகு ரூ.6,000 கோடி நிதி ஒதுக்கப்பட்டுள்ளது. தமிழகத்தில் புதிய ரயில் பாதைகள் அமைக்கப்படவுள்ளன. கன்னியாகுமரி உட்பட முக்கிய ரயில் நிலையங்கள் மேம்படுத்தப்படும். இதற்காக மாநில அரசு ஒத்துழைப்பு தந்து நிலங்களை கையகப்படுத்தி தர வேண்டும்.”
என்றார்.
புதுச்சேரி நிதி பிரச்சினை குறித்து பதில்
செய்தியாளர்கள், “புதுச்சேரிக்கு மத்திய அரசு போதுமான நிதி வழங்கவில்லையா? முதலமைச்சர் ரங்கசாமி கூட நிதி நெருக்கடியை வெளிப்படையாக தெரிவித்துள்ளார்!” என கேள்வி எழுப்பினர்.
இதற்கு பதிலளித்த எல். முருகன்,
“புதுச்சேரிக்கு எந்த நிதி நெருக்கடியும் இல்லை. ஆளுநரும் முதலமைச்சரும் கேட்ட நிதிகளை மத்திய அரசு வழங்கியுள்ளது. பிரதமரும் உள்துறை அமைச்சரும் அனைத்து உதவிகளையும் செய்கிறார்கள். எந்த பாரபட்சமும் இல்லாமல் நிதி ஒதுக்கப்பட்டுள்ளது. இது மக்களுக்கு பயன்படும் பட்ஜெட்.”
என்று தெரிவித்தார்.
“நான் தமிழ்நாடு ஸ்டைலில் பேசினால்…” – கோபமான எல். முருகன்
செய்தியாளர்கள் தொடர்ந்து புதுச்சேரி நிதி பிரச்சினையை பற்றி கேள்வி எழுப்ப, எல். முருகன் கோபம் அடைந்தார்.
“நீங்கள் பட்ஜெட் நோக்கத்தை புரிந்துகொள்ள வேண்டும். புதுச்சேரிக்கு தேவையான திட்டங்களுக்காக நிதி ஒதுக்கீடு செய்யப்பட்டுள்ளது. இன்னும் தேவைகள் இருந்தால், ஆளுநர் மற்றும் முதலமைச்சர் கோரிக்கைகளை பரிசீலித்து, அதை நிறைவேற்றுவோம்.”
என்ற அவர்,
தொடர்ந்து,
“நான் தமிழ்நாடு ஸ்டைலில் பேசினால் அது நல்லா இருக்காது. இது விவாதம் செய்யும் இடம் கிடையாது. மத்திய அரசு வரலாற்று சிறப்புமிக்க பட்ஜெட் தாக்கல் செய்துள்ளது. இது மக்களுக்குப் பயனாகும். இந்த அளவு நிதி ஒதுக்கீடு செய்யப்பட்டிருக்க, அதை வரவேற்க வேண்டும்.”
என்று கோபத்துடன் கூறினார்.
இடையிலேயே கிளம்பி சென்ற அமைச்சர் – பரபரப்பு!
தொடர்ந்து செய்தியாளர்கள் மேலும் கேள்விகள் எழுப்ப முயன்றனர். ஆனால் எல். முருகன், எதையும் பதிலளிக்காமல் உடனடியாக நிகழ்விலிருந்து வெளியேறினார்.
இதனால், செய்தியாளர் சந்திப்பில் சிறிது நேரம் பரபரப்பு ஏற்பட்டது.
