0
0
காபூல்: ஆப்கானிஸ்தானில் பெண்கள் கல்வி பெற வேண்டும் என்று வெளியுறவுத்துறை இணையமைச்சர் ஷேர் அப்பாஸ் ஸ்டனிக்ஸாய் உரையாற்றியதற்காக, தாலிபான் அரசு கடும் நடவடிக்கை எடுத்துள்ளது. இதன் விளைவாக அவர் நாட்டை விட்டு வெளியேறியுள்ளதாக தகவல்கள் வெளியாகியுள்ளன.
தாலிபான்களின் ஆட்சியும் வாக்குறுதியும்
2021-ல் அமெரிக்க ராணுவம் விலகியதன் பின்னர் ஆப்கானிஸ்தானில் தாலிபான்கள் ஆட்சியை கைப்பற்றினர். ஆரம்பத்தில், அவர்கள் முந்தைய ஆட்சியைப் போல் கடுமையான சட்டங்களை அமல்படுத்த மாட்டோம் என்று அறிவித்தனர். ஆனால், அந்த வாக்குறுதிகள் வெறும் பேச்சாகவே முடிந்தன.
தாலிபான் ஆட்சி அமர்ந்ததிலிருந்து,
- பெண்களுக்கு வேலை செய்ய தடை விதிக்கப்பட்டது.
- ஹோட்டல்கள், பூங்காக்கள், உடற்பயிற்சி மையங்களில் பெண்கள் அனுமதிக்கப்படவில்லை.
- மூடிக்கொண்ட புர்கா அணிய ஆணையிடப்பட்டது.
- பெண்கள் 6-ம் வகுப்புக்கு மேல் கல்வி பயில அனுமதி மறுக்கப்பட்டது.
2022ல் மருத்துவ கல்வியும் முடக்கப்பட்டது. உலக நாடுகள் இதை கண்டித்தும், தாலிபான்கள் தங்கள் முடிவில் நிலைத்திருந்தனர்.
பெண் கல்விக்கு ஆதரவாக பேசிய அமைச்சர்
இந்நிலையில், கடந்த மாதம் ஆப்கான்-பாகிஸ்தான் எல்லையில் உள்ள கோஸ்ட் மாகாணத்தில் நடந்த பட்டமளிப்பு விழாவில் ஷேர் அப்பாஸ் ஸ்டனிக்ஸாய் உரையாற்றினார். அப்போது, பெண்களுக்கு கல்வியை மறுப்பது ஒரு பெரிய அநீதியென அவர் கூறினார்:
“நமது நாட்டில் 2 கோடி மக்களுக்கு கல்வி மறுக்கப்பட்டுள்ளது. இது அவர்களின் அடிப்படை உரிமையை பறிக்கும் செயல். நபிகள் நாயகம் காலத்தில்கூட கல்வியின் வாயில்கள் ஆண்கள், பெண்கள் இருவருக்கும் திறந்து வைக்கப்பட்டிருந்தன.”
தாலிபான்களின் அதிரடி நடவடிக்கை!
அமைச்சரின் இந்த கடுமையான விமர்சனம் தாலிபான் தலைமைக்கு கடும் கோபத்தை ஏற்படுத்தியது. இதையடுத்து,
- ஸ்டனிக்ஸாயின் பயணங்களை தடை செய்ய உத்தரவிடப்பட்டது.
- அவரை கைது செய்ய ‘தாலிபான் சூப்ரீம் லீடர்’ ஹிபாதுல்லா அகுண்டசதா உத்தரவிட்டார்.
அமைச்சர் நாடு விட்டு தப்பினார்!
தாலிபான்களின் கடுமையான நடவடிக்கைகளால் அச்சமடைந்த ஸ்டனிக்ஸாய் விரைவாக ஐக்கிய அரபு எமிரேட்சுக்கு தப்பிச் சென்றதாக தகவல்கள் தெரிவிக்கின்றன.
பெண்களின் கல்விக்கு ஆதரவாக குரல் கொடுத்ததற்காக, தாலிபான் அரசு ஓரு அமைச்சரையே ஒடித்தது என்பது ஆப்கான் அரசியலில் பெரும் பரபரப்பை ஏற்படுத்தியுள்ளது.
