தூத்துக்குடி மாவட்டம், சாத்தான்குளம் அருகே விடுதலைச் சிறுத்தைகள் கட்சி (விசிக) கொடி கம்பம் அமைப்பதை போலீசார் தடுத்து நிறுத்தியதால் பரபரப்பு நிலவியது. இதற்கு எதிர்ப்பு தெரிவித்து திருச்செந்தூரில் விசிக தொண்டர்கள் போராட்டத்தில் ஈடுபட்டனர்.
கொடி கம்பத்திற்கு தடையா?
சடையன் கிணறு பகுதியில் அனுமதி இல்லாமல் விசிக கொடி கம்பம் அமைக்கப்படுவதாக கடந்த ஜனவரி மாதம் சாத்தான்குளம் போலீசாருக்கு தகவல் கிடைத்தது. இதையடுத்து அங்கு சென்ற போலீசார், அந்த பணிகளை தடுத்து நிறுத்தினர். இந்த சம்பவத்தால் விசிக மற்றும் போலீசாருக்கு இடையே தொடர் மோதல் நிலவி வந்தது.
போராட்டம், தள்ளுமுள்ளு, கைது!
இந்நிலையில், சாத்தான்குளம் டிஎஸ்பி சுபக்குமாரின் நடவடிக்கையை கண்டித்து, திருச்செந்தூர் பிரதான சாலையில் விசிக உறுப்பினர்கள் மறியலில் ஈடுபட்டனர். இதன் போது, போலீசாருக்கும் போராட்டக்காரர்களுக்கும் கடும் தள்ளுமுள்ளு ஏற்பட்டது.law மோதல் தீவிரமாகிய நிலையில், விசிக தொண்டர்கள் கைதுசெய்யப்பட்டு தனியார் மண்டபத்தில் தங்க வைக்கப்பட்டனர்.
முந்தைய சம்பவங்கள்
இதற்கு முன்னர், கடந்த ஆண்டு டிசம்பர் மாதம் மதுரை சத்திரபட்டி அருகே வெளிச்சநத்தம் பகுதியில், விசிக தலைவர் தொல்.திருமாவளவன் பங்கேற்க இருந்த கொடியேற்ற நிகழ்விலும் இதேபோன்ற பிரச்சனை ஏற்பட்டது.
இந்த சம்பவம், தமிழக அரசியல் வட்டாரத்தில் கவனம் ஈர்த்துள்ளது.
