0
0
தமிழ்நாடு அறிவு நகரம் திட்டத்திற்காக திருவள்ளூர் மாவட்டத்தில் நிலங்களை கையகப்படுத்துவது ஏற்க முடியாதது என்று கூறி, இந்த திட்டத்தை முற்றிலும் வேறு நகரத்திற்கு மாற்ற வேண்டும் என பாட்டாளி மக்கள் கட்சி தலைவர் அன்புமணி ராமதாஸ் தமிழக அரசுக்கு வலியுறுத்தியுள்ளார்.
அறிவு நகரம் திட்டம் – விவசாயிகள் எதிர்ப்பு!
தமிழ்நாடு அறிவு நகரம் அமைப்பதற்காக திருவள்ளூர், ஊத்துக்கோட்டை வட்டங்களில் 1703 ஏக்கர் நிலம் அடையாளம் காணப்பட்டு, அரசு நிலம் மற்றும் விவசாய நிலங்கள் கையகப்படுத்தப்படும் என்று அறிவிக்கப்பட்டது. இந்த முடிவுக்கு விவசாயிகள் மற்றும் பா.ம.க கடும் எதிர்ப்பு தெரிவித்தனர்.
இந்த எதிர்ப்பை தொடர்ந்து, தமிழக அரசு நிலப்பரப்பை 1424 ஏக்கராகவும், பின்னர் 870 ஏக்கராகவும் குறைத்தது. இது விவசாயிகளின் போராட்டத்துக்கு கிடைத்த ஒரு பகுதியாகும் என்றாலும், மொத்த திட்டத்தையும் மாற்ற வேண்டும் என்றே பா.ம.க வலியுறுத்துகிறது.
870 ஏக்கர் – விவசாய நிலங்கள் பாதுகாக்கப்பட்டுள்ளதா?
தமிழக அரசு அறிவித்த புதிய திட்டப்படி, 870 ஏக்கர் நிலத்தில் அறிவு நகரம் அமைய உள்ளது. இதில் 556 ஏக்கர் அரசு புறம்போக்கு நிலமும், 314 ஏக்கர் விவசாய நிலங்களும் உள்ளன. ஆனால், விவசாய நிலங்கள் பாதுகாக்கப்படுமா, இல்லையா? என்பது குறித்து தெளிவான விளக்கம் வெளியாகவில்லை.விவசாய நிலங்களில் இருந்து ஒரு கைப்பிடி மண்ணும் எடுக்க பா.ம.க அனுமதிக்காது என்றும், நிலம் எடுக்கும் முயற்சிகளை எதிர்த்து பெரிய போராட்டம் நடத்தப்படும் என்றும் அன்புமணி ராமதாஸ் எச்சரித்துள்ளார்.
அறிவு நகரம் – மாற்று இடம் இருக்குமா?
பா.ம.க தலைமையிலான எதிர்ப்பு நிலைபாடு ஒன்றே – விளை நிலங்களை பாதுகாக்க வேண்டும். இதற்காக அரசு சொந்தமான 556 ஏக்கர் புறம்போக்கு நிலத்தில் அறிவு நகரத்தை அமைக்கலாம். அது சாத்தியமில்லையெனில், இந்த திட்டத்தை திருவள்ளூரில் செயல்படுத்துவதை தமிழக அரசு கைவிட வேண்டும்.அதற்குப் பதிலாக, சேலம் இரும்பாலைக்கு சொந்தமான 4000 ஏக்கர் நிலம், மதுரை, கோவை போன்ற நகரங்களில் உள்ள அரசின் நிலங்களில் திட்டத்தை செயல்படுத்தலாம் என்று அவர் பரிந்துரைத்துள்ளார்.
அறிவு நகரம் – விவசாய நிலங்களை காப்பாற்ற முடியுமா?
தமிழ்நாடு அறிவு நகரம் திட்டம் வெளிநாட்டு பல்கலைக்கழகங்கள், ஆராய்ச்சி நிறுவனங்கள் மற்றும் தொழில்துறைக்கு உதவுவதாக இருந்தாலும், விவசாய நிலங்களை கையகப்படுத்தும் நிலைபாடு மாற்றப்பட வேண்டும்.இதனால், தமிழக அரசு திட்டத்தை மாற்றி அமைக்குமா? விவசாய நிலங்களை பாதுகாக்குமா? என்பது அனைவரது கவனத்திலும் உள்ளது.
