0
0
வேலூர்: தமிழ்நாடு நகர்ப்புற வாழ்விட மேம்பாட்டு வாரிய இணை மேலாண்மை இயக்குநர் விஜய கார்த்திகேயன், வேலூர் மாவட்டத்தில் நடைபெறும் வளர்ச்சி திட்டங்களை கண்காணிக்கிறார். இந்நிலையில், அவர் நேற்று மாவட்ட அதிகாரிகளுடன் ஆலோசனை கூட்டம் நடத்தி முக்கிய உத்தரவுகளை பிறப்பித்தார்.
அதில், ஆட்சேபனையற்ற அரசு புறம்போக்கு நிலங்களில் கட்டப்பட்டுள்ள 2,394 வீடுகளுக்கு பட்டா வழங்கும் பணிகளை விரைவுபடுத்த வேண்டும் என்று அவர் கேட்டுக்கொண்டார். 10 ஆண்டுகளுக்கு மேலாக அரசு நிலத்தில் வசிப்பவர்களுக்கு பட்டா வழங்க தமிழக அரசு முடிவு செய்துள்ள நிலையில், வருவாய் துறை அதிகாரிகள் இந்த நடவடிக்கையை முடிக்க வேண்டும் என அறிவுறுத்தினார்.
வளர்ச்சி திட்டங்கள் குறித்து ஆலோசனை
வேலூர் மாவட்ட கலெக்டர் அலுவலகத்தில் நடந்த இந்த ஆலோசனை கூட்டத்தில், மாவட்ட கண்காணிப்பு அலுவலர், மாவட்ட வருவாய் அலுவலர், நகராட்சி ஆணையர் உள்ளிட்ட முக்கிய அதிகாரிகள் கலந்து கொண்டனர்.
கூட்டத்தில் முதல்வர் மருந்தகங்களில் மருந்தாளுநர் மற்றும் உதவியாளர் நியமிக்க நடவடிக்கை எடுக்க வேண்டும் என்றும், இந்த திட்டம் பொதுமக்களுக்கு பயனளிக்க வேண்டும் என்பதையும் விஜய கார்த்திகேயன் வலியுறுத்தினார்.
மேலும், புதிய மினி பேருந்து வழித்தடங்கள் குறித்த ஆய்வுகள் மேற்கொள்ளப்பட வேண்டும் என்றும், மக்கள் வசிக்கும் பகுதிகள் வழியாக போக்குவரத்து வசதி இருக்கிறதா எனச் சரிபார்க்க அதிகாரிகளுக்கு உத்தரவு வழங்கினார்.
குடிநீர் விநியோகத்திற்கான நடவடிக்கைகள்
வேலூர் மாநகராட்சியில் குறைந்தபட்சம் இரண்டு நாட்களுக்கு ஒரு முறை குடிநீர் விநியோகிக்க ரூ.9 கோடி மதிப்பில் திட்டம் தயாரிக்கப்பட்டுள்ளது என்று மாநகராட்சி அதிகாரிகள் தெரிவித்தனர்.
இந்த ஆலோசனை கூட்டத்தில், மாவட்டத்தில் நடைபெறும் பல்வேறு வளர்ச்சி மற்றும் திட்ட பணிகள் குறித்தும் அதிகாரிகள் விளக்கமளித்தனர்.
