தீபாவளி பண்டிகையை முன்னிட்டு சென்னையில் இருந்து மக்கள் சொந்த ஊர்களுக்கு திரண்டு செல்வதால் தலைநகரம் முழுவதும் போக்குவரத்து நெரிசல் ஏற்பட்டுள்ளது.
திங்கட்கிழமை தீபாவளி கொண்டாடப்படுவதால், வெள்ளிக்கிழமை மாலை முதலே பலர் சென்னையிலிருந்து பேருந்து, ரயில், கார், இருசக்கர வாகனங்களில் பயணத்தைத் தொடங்கினர். இதன் விளைவாக, தாம்பரம் ஜிஎஸ்டி சாலை மற்றும் சென்னை–பூந்தமல்லி நெடுஞ்சாலையில் வாகனங்கள் நீண்ட வரிசையாக நகர்ந்தன.
போக்குவரத்து நெரிசலை குறைக்க சிங்கப்பெருமாள்கோவிலில் இருந்து சென்னையை நோக்கி வரும் கனரக வாகனங்கள் ஒரகடம் வழியாக மாற்றப்பட்டன. இதனால் அந்தப் பகுதியில் சுமார் 3 கி.மீ. நீளமான வாகன வரிசை காணப்பட்டது.
இருசக்கர வாகனங்களுக்கு தனி வழி ஏற்பாடு செய்யப்பட்டதுடன், பல இடங்களில் போக்குவரத்து போலீஸார் பணியில் ஈடுபட்டிருந்தனர். பரனூர் சுங்கச்சாவடியில் பெரும் நெரிசல் இல்லாமல் போக்குவரத்து சீராக நடைபெற்றது.
ஆனாலும், தீபாவளி காலத்தில் சில ஆம்னி பேருந்துகள் கூடுதல் கட்டணம் வசூலித்ததாக பொதுமக்கள் குற்றச்சாட்டு எழுப்பினர். சென்னை–கோவை, மதுரை, திருநெல்வேலி உள்ளிட்ட வழித்தடங்களில் அதிக கட்டணம் வசூலிக்கப்பட்டதாக புகார்கள் தெரிவிக்கப்பட்டுள்ளன.
சென்னை சென்ட்ரல், எழும்பூர் ரயில் நிலையங்கள் மற்றும் கிளாம்பாக்கம் பேருந்து நிலையங்களில் பெரும் பயணிகள் கூட்டம் காணப்பட்டது. காத்திருப்போருக்காக இசை நிகழ்ச்சி நடைபெற்றது; அங்கு அமைச்சர் சிவசங்கர் ஆய்வு செய்தார்.
அதேபோல், கோவையில் சிங்காநல்லூர் பேருந்து நிலையத்திலும் பயணிகள் கூட்டம் பெருகியது. பெங்களூரு நோக்கி செல்லும் வழித்தடங்களில், குறிப்பாக ஜுஜுவாடி முதல் ஓசூர் வரை போக்குவரத்து நெரிசல் ஏற்பட்டது.
இதோடு, தீபாவளி ஷாப்பிங்கும் களைகட்டிய நிலையில், சென்னை தியாகராயநகர் மற்றும் கோவை ஒப்பணக்கார வீதி, ராஜவீதிகளில் மக்கள் திரள் காணப்பட்டது. திருச்சியில் மழை இடையூறு செய்தாலும், மக்கள் ஷாப்பிங்கை தொடர்ந்தனர்.
மக்களின் கோரிக்கைக்கு இணங்க, அக்டோபர் 21ஆம் தேதி (தீபாவளிக்கு மறுநாள்) தமிழக அரசு அனைத்து அரசு அலுவலகங்கள், கல்வி நிறுவனங்களுக்கு விடுமுறை அறிவித்துள்ளது. இதற்கான ஈடாக அக்டோபர் 25ஆம் தேதி (சனிக்கிழமை) வேலை நாளாக அறிவிக்கப்பட்டுள்ளது.
Summary :
Tamil Nadu govt declares Oct 21 as a public holiday after Diwali; massive traffic as people travel to hometowns for the festive weekend.
