அதிமுக உள்கட்சிப் பிரச்சினைகள் தீவிரமடைந்து வரும் நிலையில், கட்சியின் பொதுச்செயலாளர் எடப்பாடி பழனிசாமி கடுமையாக மனஅழுத்தத்தில் இருப்பதாக நெருக்கமான வட்டாரங்கள் தெரிவிக்கின்றன. தற்போது அதிமுகவில் நடக்கும் மாற்றங்களுக்கு பின்னால் “மூன்றாவது கண்” எனப்படும் புதிய அரசியல் ஆட்டம் தொடங்கியுள்ளதாக கூறப்படுகிறது.
சமீபத்தில், முன்னாள் அமைச்சர் கே.ஏ. செங்கோட்டையன், எடப்பாடிக்கு எதிராக கடும் எச்சரிக்கை விடுத்தார். “அதிமுக தொடர் தோல்விகளில் இருந்து மீள வேண்டுமானால், கட்சியில் இருந்து நீக்கப்பட்டவர்களை உடனே மீண்டும் சேர்க்க வேண்டும். இல்லையெனில், பத்து நாட்களில் நான் தனியாக கட்சி ஒருங்கிணைப்பு பணியில் இறங்குவேன்,” என்று எச்சரித்திருந்தார்.
அதன்பின், டி.டி.வி. தினகரன், ஓ. பன்னீர்செல்வம், மற்றும் செங்கோட்டையன் மூவரும் ஒரே மேடையில் தோன்றி, பசும்பொன் முத்துராமலிங்க தேவரின் நினைவிடத்தில் மரியாதை செலுத்தினர். “எடப்பாடியே எங்களின் எதிரி. துரோகத்தை வீழ்த்துவதே எங்கள் நோக்கம்,” என்று மூவரும் ஒருமித்த குரலில் கூறினர்.
தினகரன் கூறியதாவது, “அமமுக தொடங்கப்பட்டதே பழனிசாமி செய்த துரோகத்துக்கு எதிராகத்தான். ஜெயலலிதா ஆட்சியை மீண்டும் உருவாக்கவும், அவரின் உண்மையான தொண்டர்களை காப்பாற்றவும் நாங்கள் ஒன்றிணைந்துள்ளோம்,” எனத் தெரிவித்தார்.
இதையடுத்து, அதிமுக பொதுச்செயலாளர் எடப்பாடி பழனிசாமி செங்கோட்டையனை கட்சியிலிருந்து அனைத்து பொறுப்புகளிலும் இருந்து நீக்கும் அதிரடி நடவடிக்கை எடுத்தார்.
அதற்கு பதிலாக செங்கோட்டையன், “இபிஎஸ் கட்சியை குடும்ப ஆட்சியாக்கி விட்டார். மகன், மருமகன், மைத்துனர் வழியாகவே அதிமுக நடத்தப்படுகிறது. சசிகலா தான் இபிஎஸை முதலமைச்சராக ஆக்கியவர், ஆனால் அவர் அதே சசிகலாவையே அவமதித்தார்,” என்று கடுமையாக விமர்சித்தார்.
அதிமுக உள்கட்சிப் பிரச்சினை தீவிரமடைந்து வரும் நிலையில், எடப்பாடி பழனிசாமிக்கு இது பெரிய அதிர்ச்சியாகும் என அரசியல் வட்டாரங்கள் கூறுகின்றன.
“மூன்றாவது கண்” என அழைக்கப்படும் இந்த புதிய அரசியல் இணைப்பு, அதிமுக எதிர்காலத்தில் பெரும் கலகத்திற்கான முன்னோட்டமாகக் கருதப்படுகிறது.
Summary :
AIADMK faces fresh chaos as Sengottaiyan joins Dhinakaran and OPS against EPS, triggering a major internal revolt and alliance shifts.
