வங்கக்கடலில் உருவான அதிதீவிர ‘மோந்தா’ புயல், நேற்று (அக்டோபர் 28) மாலை ஆந்திரா மாநிலத்தின் காக்கிநாடா – மசூலிப்பட்டினம் இடையே மணிக்கு 110 கி.மீ. வேகத்தில் கரையை கடந்தது. இதன் தாக்கத்தால் பல மாவட்டங்களில் கடும் காற்றும் கனமழையும் ஏற்பட்டு பெரும் சேதங்கள் ஏற்பட்டுள்ளன.
கோனசீமா மாவட்டம் மகனகுடெம் கிராமத்தில் பலத்த காற்றால் பனைமரம் விழுந்ததில் ஒரு பெண் உயிரிழந்ததாக காவல்துறை தெரிவித்துள்ளது.
இந்திய வானிலை ஆய்வுத்துறை (IMD) தெரிவித்ததன்படி, புயல் மாலை 7 மணியளவில் கரையை கடக்கத் தொடங்கி, மணிக்கு 100–110 கி.மீ. வேகத்தில் வீசியது. இதனால் காக்கிநாடா, விசாகப்பட்டினம், கிருஷ்ணா, மேற்கு கோதாவரி, விஜயநகரம் உள்ளிட்ட மாவட்டங்களில் சிவப்பு எச்சரிக்கை (Red Alert) அறிவிக்கப்பட்டது.
புயல் தாக்கத்தால் சுமார் 38,000 ஹெக்டேரில் நின்ற பயிர்களும், 1.38 லட்சம் ஹெக்டேரில் தோட்டக்கலைப் பயிர்களும் சேதமடைந்துள்ளன. பாதிக்கப்பட்ட பகுதிகளில் 76,000 பேர் நிவாரண முகாம்களில் தங்கவைக்கப்பட்டுள்ளனர். 219 மருத்துவ முகாம்கள் தொடங்கப்பட்டுள்ளன.
போக்குவரத்து தடை & ரயில் ரத்து:
கிருஷ்ணா, ஏலூரு, காக்கிநாடா ஆகிய மாவட்டங்களில் நேற்று இரவு 8.30 மணி முதல் இன்று காலை 6 மணி வரை சாலைவழி போக்குவரத்து தடை செய்யப்பட்டது. அத்தியாவசிய சேவைகளுக்கு மட்டும் அனுமதி அளிக்கப்பட்டது.
இந்திய ரயில்வே பல ரயில்களை ரத்து செய்ததுடன், மாற்றுப் பாதையில் இயக்கவும் நேரம் மாற்றவும் நடவடிக்கை எடுத்தது. விசாகப்பட்டினம் விமான நிலையத்திலிருந்து 32 விமானங்கள் ரத்து செய்யப்பட்டன.
மீட்பு நடவடிக்கைகள்:
11 தேசிய பேரிடர் மீட்புப் படை (NDRF) மற்றும் 12 மாநில பேரிடர் மீட்புப் படை (SDRF) குழுக்கள் தயார் நிலையில் உள்ளன. மின்சாரம் துண்டிக்கப்பட்ட இடங்களில் மொபைல் ஜெனரேட்டர்கள் மற்றும் அவசர மீட்புக் குழுக்கள் நியமிக்கப்பட்டுள்ளன. கடற்கரைப் பகுதிகளில் தீயணைப்பு வீரர்கள், நீச்சல் வீரர்கள் மற்றும் உயிர்காக்கும் உபகரணங்கள் தயார் நிலையில் உள்ளன.
ஒடிசா மாநிலம் முழுவதும் புயல் தாக்கம் உணரப்பட்டது. கஞ்சம், கஜபதி, ராயகடா, மல்கான்கிரி மாவட்டங்களில் கனமழையுடன் இடியுடன் கூடிய மழை பெய்தது. மரங்கள் சாய்ந்தன, சாலைகள் தடைப்பட்டன, வீடுகள் சேதமடைந்தன.
ஒடிசா முதல்வர் மோகன் சரண் மாஜி, நிலைமையை ஆய்வு செய்து, “பாதிக்கப்பட்டவர்களுக்கு பாதுகாப்பு வழங்கி, ஜீரோ உயிரிழப்பு (Zero Casualty) இலக்கை உறுதி செய்யுங்கள்” என்று அதிகாரிகளுக்கு அறிவுறுத்தினார். மாநிலம் முழுவதும் 2,000-க்கும் மேற்பட்ட புயல் பாதுகாப்பு மையங்கள் தொடங்கப்பட்டுள்ளன; 12,000-க்கும் மேற்பட்டோர் அவ்விடங்களுக்கு மாற்றப்பட்டுள்ளனர்.
Summary :
Cyclone Monda lashed Andhra at 110 kmph, killing one and damaging thousands of hectares. 76,000 sheltered, trains and flights disrupted.
