சேந்தமங்கலம் திமுக எம்.எல்.ஏ. பொன்னுசாமி மாரடைப்பால் காலமானார்

நாமக்கல் மாவட்டம் சேந்தமங்கலம் தொகுதி திமுக சட்டமன்ற உறுப்பினர் பொன்னுசாமி (74) இன்று (அக்டோபர் 23, வியாழக்கிழமை) அதிகாலை மாரடைப்பால் காலமானார்.

கொல்லிமலையில் உள்ள தனது இல்லத்தில் திடீரென நெஞ்சுவலி ஏற்பட்டதைத் தொடர்ந்து, உறவினர்கள் அவரை 108 ஆம்புலன்ஸில் நாமக்கல்லில் உள்ள தனியார் மருத்துவமனைக்கு கொண்டு சென்றனர். ஆனால் அங்கு பரிசோதித்த மருத்துவர்கள் அவர் ஏற்கனவே உயிரிழந்துவிட்டதாக தெரிவித்தனர்.

பொன்னுசாமிக்கு முன்பாகவே இரண்டு முறை மாரடைப்பு ஏற்பட்டிருந்ததாகவும், ஆஞ்சியோ சிகிச்சை அளிக்கப்பட்டிருந்ததாகவும் தெரிவிக்கப்பட்டுள்ளது.

2006-2011 காலப்பகுதியில் திமுக சட்டமன்ற உறுப்பினராகப் பணியாற்றிய அவர், 2021-ஆம் ஆண்டு மீண்டும் வெற்றி பெற்று தற்போது எம்.எல்.ஏ.வாக இருந்தார்.

அவர் தனது அரசியல் வாழ்க்கையை அதிமுகவில் தொடங்கி, பின்னர் திமுகவில் இணைந்து சேந்தமங்கலம் பழங்குடியினர் தொகுதியில் வெற்றி பெற்றார்.

மலைவாழ் மக்களின் அடிப்படை வசதிகள், சாலை மற்றும் குடிநீர் பிரச்சனைகளை தீர்க்கப் பல நடவடிக்கைகள் எடுத்தார். எளிமையான பண்பும், மக்களோடு நெருக்கமும் கொண்ட தலைவராக பொன்னுசாமி அறியப்பட்டார்.

அவரது திடீர் மறைவு திமுகவினரிடையே மற்றும் நாமக்கல் மக்களிடையே ஆழ்ந்த சோகத்தை ஏற்படுத்தியுள்ளது.

Summary :
DMK MLA Ponnusamy from Senthamangalam died of a heart attack at his Kolli Hills residence. His sudden demise shocked DMK cadres and locals.