எந்த மாநிலமாக இருந்தாலும் திராவிட மாடல் ஆட்சிதான் முதன்மை என்று தமிழக தொழில்துறை அமைச்சர் டி.ஆர்.பி. ராஜா தெரிவித்தார். புதுச்சேரியிலும் மக்கள் எழுச்சியுடன் இருப்பதால், அங்கு ஆக்கப்பூர்வமான வளர்ச்சி சார்ந்த அரசு அமையும் என்பது உறுதி என அவர் கூறினார்.
வரவிருக்கும் 2026 சட்டமன்றத் தேர்தலை முன்னிட்டு புதுச்சேரி மாநில திமுக சார்பில் வாக்குச்சாவடி முகவர்கள் கூட்டம் கம்பன் கலையரங்கத்தில் நடைபெற்றது. இக்கூட்டத்தில் அமைச்சர் டி.ஆர்.பி. ராஜா, திமுக கொள்கை பரப்புச் செயலாளர் ஜெகத்ரட்சகன் எம்.பி ஆகியோர் கலந்து கொண்டு பேசினர்.
வாக்குச்சாவடி முகவர்களுக்கு நவீன பயிற்சி
புதுச்சேரி மாநில அமைப்பாளர் மற்றும் எதிர்க்கட்சித் தலைவர் சிவா தலைமையில் நடைபெற்ற இந்த கூட்டத்தில், மாநிலத்தின் 23 தொகுதிகளைச் சேர்ந்த சுமார் 800 வாக்குச்சாவடி முகவர்கள் பங்கேற்றனர். முகவர்களுக்காக “உடன்பிறப்பே வா” என்ற புதிய செயலி அறிமுகப்படுத்தப்பட்டு, தேர்தலை நவீன முறையில் எதிர்கொள்வது மற்றும் வாக்காளர்களை ஒருங்கிணைப்பது குறித்து பயிற்சி அளிக்கப்பட்டது.
தமிழக அரசின் சாதனைகள் குறித்து டி.ஆர்.பி. ராஜா
பின்னர் செய்தியாளர்களிடம் பேசிய அமைச்சர் டி.ஆர்.பி. ராஜா,
“ஒன்றிய அரசின் ஒத்துழைப்பு இல்லாத நிலையிலும், கொரோனா பேரிடரைத் தாண்டி தமிழகம் 16 சதவீத பொருளாதார வளர்ச்சியை எட்டியுள்ளது. கலைஞர் ஆட்சிக்காலத்தில் இது 13 சதவீதமாக இருந்தது. இதற்கான ஆதாரங்களை ஒன்றிய அரசே வெளியிட்டுள்ளது” என்றார்.
மேலும், புதுமைப்பெண், தமிழ்புதல்வன், விடியல் பயணம் போன்ற தமிழக அரசுத் திட்டங்கள் புதுச்சேரியிலும் அமல்படுத்தப்பட வேண்டும் என மக்கள் விரும்புவதாகக் கூறினார். திமுக ஆட்சி அமைந்தால், விமான நிலைய விரிவாக்கம் மற்றும் சுற்றுலா வளர்ச்சித் திட்டங்கள் போர்க்கால அடிப்படையில் நிறைவேற்றப்படும் என்றும் அவர் தெரிவித்தார்.
ஜெகத்ரட்சகன் எம்.பி பதில்
கூட்டத்தில் பேசிய திமுக மேலிடப் பொறுப்பாளர் ஜெகத்ரட்சகன் எம்.பி,
“தமிழக அரசு குறித்து அதிமுக பொதுச்செயலாளர் எடப்பாடி பழனிசாமி பேசுவது வெறும் விரக்தியின் வெளிப்பாடு. அதற்கு பதிலளிக்க வேண்டிய அவசியமில்லை. புதுச்சேரியில் 100 அல்ல, 200 சதவீதம் திராவிட மாடல் ஆட்சி அமையும். ஆட்சி யார் தலைமையில் அமையும் என்பது குறித்து திமுக தலைமைதான் முடிவெடுக்கும்” என்றார்.
தமிழகத்தின் வெற்றிகரமான நிர்வாகத்தை முன்னுதாரணமாகக் கொண்டு, புதுச்சேரியிலும் ஆட்சியைப் பிடிக்க திமுக தீவிர வியூகத்தை வகுத்து வருவதாக இந்த கூட்டம் மூலம் தெரிவிக்கப்பட்டது.
Summary :
Minister TRB Raja asserted that the Dravidian Model of governance will take root in Puducherry, citing Tamil Nadu’s growth and welfare schemes.
