வி.ஏ.ஓ (கிராம நிர்வாக அலுவலர்) பணியிட மாறுதல் கலந்தாய்வு நடைபெறும் வரை, 218 காலிப் பணியிடங்களை நேரடி நியமனத்தின் மூலம் நிரப்பத் தடை விதித்து, மதுரைக் கிளை உயர்நீதிமன்றம் இடைக்கால உத்தரவு பிறப்பித்துள்ளது.
தமிழ்நாடு கிராம நிர்வாக அலுவலர் சங்கத்தின் பொதுச்செயலாளர் அருள்ராஜ் மற்றும் அலுவலர் அகமது ஃபயஸ் ஆகியோர் தாக்கல் செய்த மனுவின் பேரில் இந்த உத்தரவு வழங்கப்பட்டது.
மனுவில் குறிப்பிடப்பட்டதாவது:
“தமிழ்நாட்டின் பல மாவட்டங்களில் காலியாக உள்ள 218 வி.ஏ.ஓ பணியிடங்களை நிரப்பும் பொருட்டு, கடந்த மே மாதம் அறிவிப்பு வெளியிடப்பட்டு, செப்டம்பர் 1 முதல் 15ஆம் தேதி வரை ஆன்லைன் மூலம் விண்ணப்பங்கள் பெறப்பட்டன. ஆனால், மாவட்ட அளவிலான பணியிட மாறுதல் முடிந்த பின் மட்டுமே காலியிடங்களை நேரடி முறையில் நிரப்ப வேண்டும் என்ற விதி பின்பற்றப்படவில்லை.
ஏற்கனவே, வி.ஏ.ஓ முதுநிலை பட்டியலை புறக்கணித்து, பணியில் சேர்ந்த தேதியை அடிப்படையாகக் கொண்டு இடமாற்றம் செய்வது தவறு என நீதிமன்றம் தடை விதித்துள்ளது. இதனை மீறி தற்போது அரசு, 218 காலிப் பணியிடங்களை நேரடியாக நிரப்புவதற்காக டி.என்.பி.எஸ்.சி-க்கு அனுப்பியுள்ளது. இதனால், இடமாறுதலுக்காக பல ஆண்டுகளாக காத்திருக்கும் அலுவலர்கள் பாதிக்கப்படுகிறார்கள். எனவே, நேரடி நியமனத்துக்கு இடைக்கால தடை விதிக்க வேண்டும்,” என மனுவில் கூறப்பட்டுள்ளது.
இந்த மனு நீதிபதி குமரேஷ்பாபு முன்னிலையில் விசாரணைக்கு வந்தபோது, மாவட்ட பணியிட மாறுதல் நடைமுறை முடியும் வரை டி.என்.பி.எஸ்.சி வி.ஏ.ஓ காலியிடங்களை நிரப்ப தடை விதிக்கப்படுகிறது என நீதிமன்றம் உத்தரவிட்டது.
மேலும், வருவாய் துறை ஆணையரும், டி.என்.பி.எஸ்.சி தலைவரும் பதில் மனு தாக்கல் செய்ய வேண்டும் என உத்தரவிட்டு, வழக்கின் மேலான விசாரணையை நவம்பர் 14 ஆம் தேதிக்கு நீதிமன்றம் ஒத்திவைத்தது.
Summary :
Madras HC bars TNPSC from filling 218 VAO posts until transfer counseling concludes; seeks response from Revenue Dept and TNPSC by Nov 14.
