அரசு மருத்துவமனைகளுக்கான மருந்து மாத்திரைகள் கொள்முதல் செய்யும் பணியில் இடம்பெற்றதாக கூறப்படும் ஊழல் வழக்கில் அப்போதைய சுகாதாரத்துறை அமைச்சர் மல்லாடி கிருஷ்ணராவுக்கு தொடர்பு இருப்பதாக புதுச்சேரி காங்கிரஸ் குற்றம்சாட்டியுள்ளது. இதனால், அவரின் தற்போதைய பதவி நீக்கப்பட்டு, விசாரணைக்கு உட்படுத்த வேண்டும் என்று காங்கிரஸ் வலியுறுத்தியுள்ளது.
இந்த விவகாரம் குறித்து புதுச்சேரி காங்கிரஸ் அலுவலகத்தில் செய்தியாளர்களை சந்தித்த கட்சித் தலைவர் வைத்திலிங்கம் எம்.பி. கூறியதாவது:
“கடந்த காங்கிரஸ் ஆட்சிக் காலத்தில் அரசு மருத்துவமனைகளுக்கு மருந்து மாத்திரைகள் கொள்முதல் செய்யப்பட்டதில் ஊழல் நடந்ததாக அப்போதைய காங்கிரஸ் எம்.எல்.ஏ. பாலன் புகார் அளித்திருந்தார். அந்த புகாரின் பேரில் லஞ்ச ஒழிப்பு போலீசார் வழக்கு பதிவு செய்தனர்.
இப்போது நான்கு ஆண்டுகளுக்குப் பிறகு, சுகாதாரத்துறையின் முன்னாள் இயக்குநர்கள் உட்பட ஆறு பேர் கைது செய்யப்பட்டுள்ளனர். ஆனால், அக்காலத்தில் சுகாதாரத்துறை அமைச்சராக இருந்த மல்லாடி கிருஷ்ணராவுக்கும் இந்த ஊழலில் தொடர்பு உள்ளது. எனவே, அவர் தற்போது வகித்து வரும் புதுச்சேரி அரசின் டெல்லி மேலிட சிறப்பு பிரதிநிதி பதவி நீக்கப்பட்டு, அவரையும் விசாரணைக்கு உட்படுத்த வேண்டும்,” என வைத்திலிங்கம் தெரிவித்தார்.
அதனைத் தொடர்ந்து, முன்னாள் அரசு கொறடா ஆனந்தராமன் கூறியதாவது:
“தமிழகம் மற்றும் புதுச்சேரியில் இன்னும் நான்கு மாதங்களில் தேர்தல் நடைபெற உள்ளது. இதற்கான சிறப்பு வாக்காளர் பட்டியல் திருத்தப் பணி நடைபெற்று வருகிறது. நாடாளுமன்றத் தேர்தலில் பா.ஜ.க வெற்றி பெற்றதைத் தொடர்ந்து, புதுச்சேரி மக்கள் ஆட்சிமாற்றத்திற்காக தயார் நிலையில் உள்ளனர். ஆனால், பா.ஜ.க மற்றும் என்.ஆர்.காங்கிரஸ் கூட்டணி மீதான நம்பிக்கையை மக்கள் இழந்துவிட்டனர். இதனால், வரவிருக்கும் தேர்தலில் வாக்கு திருட்டு நடத்தும் முயற்சியில் பா.ஜ.க மற்றும் தேர்தல் ஆணையம் இணைந்து செயல்படுகின்றன,” என அவர் குற்றம் சாட்டினார்.
Summary :
Puducherry Congress calls for inquiry into ex-minister Malladi Krishnarao over alleged hospital medicine purchase scam, demanding his removal.
