இந்திய வானிலை ஆய்வு மையம் (IMD) வெளியிட்ட புதிய தகவலின்படி, இந்த ஆண்டுக்கான தென்மேற்குப் பருவமழை (Southwest Monsoon) இன்னும் இரண்டு நாட்களில் முழுமையாக விலகும். வழக்கமான அட்டவணைப்படி அக்டோபர் 15-ம் தேதியை ஒட்டி விலகும் என எதிர்பார்க்கப்படுகிறது.
IMD தெரிவித்ததாவது, இந்த ஆண்டின் தென்மேற்குப் பருவமழை, நீண்டகால சராசரி (LPA) அளவை விட 108% அதிக மழையைப் பதிவு செய்துள்ளது. வடகிழக்கு இந்தியாவின் சில இடங்களைத் தவிர, நாட்டின் பெரும்பாலான பகுதிகளில் இயல்பான அல்லது அதிகமான மழை பெய்துள்ளது.
வடகிழக்குப் பருவமழை தொடங்கும் சாத்தியம்
வானிலை ஆய்வு மையம் கூறியதாவது, தென்னிந்தியத் தீபகற்பம் மற்றும் தெற்கு, மத்திய வங்காள விரிகுடா பகுதிகளில் கிழக்கு மற்றும் வடகிழக்கு திசை காற்று வீசத் தொடங்கியுள்ளதால், அடுத்த இரண்டு நாட்களில் வடகிழக்குப் பருவமழை தெற்குத் தீபகற்பத்தில் தொடங்கும் வாய்ப்பு அதிகம் என தெரிவித்துள்ளது.
கடந்த சில நாட்களாக தென்னிந்தியப் பகுதிகள் பலத்த மற்றும் பரவலான மழையைப் பெற்றுள்ளன. இதுவே வடகிழக்குப் பருவமழை தொடங்குவதற்கான சாதகமான வளிமண்டல சூழல் என வானிலை ஆய்வு மையம் விளக்கியுள்ளது.
அக்டோபர் முதல் டிசம்பர் வரை நீடிக்கும் இந்த வடகிழக்குப் பருவமழை, குளிர்காலப் பருவமழையாகவும் அழைக்கப்படுகிறது. இந்த காலத்தில் தமிழ்நாடு, புதுச்சேரி, ராயலசீமா, கடலோர ஆந்திரா, தென் உள் கர்நாடகா மற்றும் கேரளா உள்ளிட்ட பகுதிகள் முக்கியமான மழையைப் பெறுகின்றன.
கனமழை எச்சரிக்கை
வடகிழக்குப் பருவமழை தொடங்கவிருப்பதை முன்னிட்டு, அக்டோபர் 20-ம் தேதி வரை தமிழ்நாடு, கேரளா மற்றும் மாஹே பகுதிகளில் கனமழை பெய்யும் என IMD எச்சரிக்கை விடுத்துள்ளது. அதேபோல், தென் உள் கர்நாடகா, கடலோர ஆந்திரா, ஏனாம் மற்றும் ராயலசீமா பகுதிகளில் வியாழக்கிழமை வரை கனமழை பெய்ய வாய்ப்பு உள்ளது.
Summary :
The India Meteorological Department (IMD) has announced that the Southwest Monsoon will retreat from India within two days.
