சுற்றுச்சூழல் பாதுகாப்பு, பிளாஸ்டிக் ஒழிப்பு மற்றும் வனவிலங்கு காப்பு ஆகிய துறைகளில் தொடர்ந்து, முன்னோடியாக செயல்பட்டு வந்ததற்காக, தமிழ்நாடு கூடுதல் தலைமைச் செயலாளர் சுப்ரியா சாகுவுக்கு, 2025ஆம் ஆண்டுக்கான ஐக்கிய நாடுகள் சபையின் உயரிய சுற்றுச்சூழல் விருதான ‘சாம்பியன்ஸ் ஆஃப் தி எர்த்’ விருது வழங்கப்பட்டுள்ளது. நைரோபியில் உள்ள ஐ.நா சுற்றுச்சூழல் திட்டம் (UNEP) இந்த உயரிய கௌரவத்தை அறிவித்துள்ளது.
‘உத்வேகம் மற்றும் செயல்பாடு’ (Inspiration and Action) பிரிவில் இவரது நீண்டகால சேவைகள் உயர்ந்து மதிப்பிடப்பட்டுள்ளன.
சுப்ரியா சாகு — யார் இவர்?
கடந்த நான்கரை ஆண்டுகளாக, தமிழக அரசின் சுற்றுச்சூழல், காலநிலை மாற்றம் மற்றும் வனத்துறை கூடுதல் தலைமைச் செயலாளராகப் பணியாற்றி வருகிறார். இயற்கையை நேசிக்கும் மனப்பான்மை இவருக்குக் குழந்தைப்பருவத்திலேயே உருவானது. குறிப்பாக யானைகளின் ஒற்றுமை, குடும்ப பிணைப்பு, தலைமைத்திறன் போன்றவற்றை கற்றுக்கொள்ளலாம் என்று இவர் அடிக்கடி கூறுவார்.
திருப்பத்தை ஏற்படுத்திய நிகழ்வு:
நீலகிரியில் ஆட்சியராகப் பணியாற்றிய போது, விலங்குகள் பிளாஸ்டிக் குப்பையை உண்பதை கண்டு அதிர்ச்சியடைந்ததாகவும், “நமது கிரகம் மூச்சுத்திணறுகிறது என்பதை அப்போது உணர்ந்தேன்” என அவர் நினைவுகூருகிறார்.
ஐ.நா விருதுக்கான முக்கிய காரணங்கள் — சுப்ரியா சாகுவின் முக்கியப் பணிகள்
1. பிளாஸ்டிக் ஒழிப்பு & சுற்றுச்சூழல் மேம்பாடு
ஆபரேஷன் ப்ளூ மவுண்டன் (2000)
நீலகிரி ஆட்சியராக இருந்தபோது, ஒருமுறை பயன்படுத்தப்படும் பிளாஸ்டிக்கை ஒழிப்பதற்காக இந்த முக்கியமான பிரச்சாரத்தைத் தொடங்கினார் — அப்போது பிளாஸ்டிக் மாசு குறித்து விழிப்புணர்வு மிகக் குறைவு.
மாபெரும் மரநடுகை & காடுகள் விரிவாக்கம்
-
தமிழகத்தில் 100 மில்லியனுக்கும் (10 கோடி) அதிகமான மரங்கள் நடப்பட்டது.
-
65 புதிய ரிசர்வ் காடுகள் உருவாக்கப்பட்டன.
-
மாநிலத்தின் மாங்குரோவ் காடுகள் இருமடங்காக பெருகின.
-
ஈரநிலங்கள் 1 இடத்திலிருந்து 20 ஆக உயர்த்தப்பட்டன.
-
$60 மில்லியன் மதிப்பிலான அருகிவரும் உயிரினங்கள் பாதுகாப்பு நிதி தொடங்கப்பட்டது.
2. காலநிலை மாற்ற மேலாண்மை & சமூக பாதுகாப்பு
தமிழ்நாடு பசுமைக் காலநிலை நிறுவனம்
கடற்கரை பகுதிகளின் நெகிழ்ச்சித் திறன், நகர்ப்புற வெப்பநிலை உயர்வு, அதிகரித்து வரும் குளிரூட்டும் தேவைகள் ஆகியவற்றைக் கையாள உருவாக்கப்பட்டது.
கூலிங் ரூஃப் திட்டம்
வெப்பத்தைக் குறைக்கும் நோக்கில் உருவாக்கப்பட்ட இந்தத் திட்டம் தற்போது 200 பசுமை பள்ளிகளில் நடைமுறைப்படுத்தப்பட்டுள்ளது.
பசுமை வேலைவாய்ப்புகள்
இவரது முயற்சிகள்:
-
மில்லியன் கணக்கான பசுமை வேலைவாய்ப்புகளை உருவாக்கின.
-
1 கோடியே 20 லட்சம் (12 மில்லியன்) மக்களுக்கு சுற்றுச்சூழல் சார்ந்த பாதுகாப்பை வழங்கின.
உலகுக்கான முன்னோடி
சுப்ரியா சாகுவின் ஒருங்கிணைந்த நிர்வாக செயல்முறைகள், இயற்கை அடிப்படையிலான தீர்வுகள், பசுமைக் குடில் வாயு வெளியீடு குறைப்பு மற்றும் பாதிக்கப்படக்கூடிய சமூகங்களைப் பாதுகாக்கும் முயற்சிகள் அனைத்தும் இந்திய மாநிலங்களுக்கு மட்டுமல்ல, உலகிற்கே ஒரு எடுத்துக்காட்டு என ஐ.நா குறிப்பிட்டுள்ளது.
Summary :
TN IAS officer Supriya Sahu wins UN’s top environmental award for her pioneering work in plastic ban, forest expansion, climate action and wildlife conservation.
