மதுரை திருப்பரங்குன்றம் மலை உச்சியில் உள்ள தூண் தீபத்தூண் அல்ல, அது சாதாரண கிரானைட் கல் தூண்தான்; கடந்த 175 ஆண்டுகளாக அங்கு தீபம் ஏற்றப்பட்டதாக எந்த ஆதாரமும் இல்லை என்று கோவில் நிர்வாகம் உயர்நீதிமன்றத்தில் வலியுறுத்தியுள்ளது.
கார்த்திகை தீப தினத்தில் வழக்கமாக உச்சிப் பிள்ளையார் கோயில் மண்டபத்தில் மட்டுமே தீபம் ஏற்றும் நடைமுறைக்கு மாறாக, மலை உச்சி விளக்குத் தூணில் தீபம் ஏற்ற அனுமதி கோரி ராம ரவிக்குமார் உள்ளிட்டோர் மனு தாக்கல் செய்திருந்தனர். இந்த மனுவை விசாரித்த தனி நீதிபதி ஜி.ஆர். சுவாமிநாதன் மலை உச்சியில் தீபம் ஏற்ற அனுமதி வழங்கியிருந்தார்.
இந்த உத்தரவுக்கு எதிராக, திருப்பரங்குன்றம் கோவில் செயல் அலுவலரும், மதுரை கலெக்டரும் தனித்தனியாக மேல்முறையீட்டு மனுக்கள் தாக்கல் செய்தனர். இந்த மனுக்கள் நீதிபதிகள் ஜெயச்சந்திரன் மற்றும் கே.கே. ராமகிருஷ்ணன் அமர்வில் விசாரணைக்கு வந்தன.
அப்போது அரசுத் தரப்பு,
“மலை உச்சியில் உள்ளது சர்வே தூண்; அது தீபத்தூண் இல்லை. அருகில் உள்ள நெல்லித்தோப்பு மற்றும் தர்கா பகுதிகள் தர்காவிற்கும், மற்றவை கோவில் நிர்வாகத்திற்கும் சொந்தமானவை. தீபம் ஏற்றும் இடத்தை தீர்மானிக்கும் அதிகாரம் கோவில் நிர்வாகத்துக்கே உண்டு” என்று வாதிட்டது.
மனுதாரர்கள் கூறும் ‘தீபத்தூண்’ என்பதற்கான எந்த ஆதாரமும் இல்லை என்றும் அவர்கள் சுட்டிக்காட்டினர்.
கோவில் நிர்வாகம் சார்பில் ஆஜராகிய வழக்கறிஞர் சண்முகசுந்தரம் தெரிவித்ததாவது:
“மலையில் தீபம் ஏற்ற தனிநபர்களுக்கு உரிமை இல்லை; அது கோவில் நிர்வாகத்தின் அதிகாரப்பூர்வ முடிவாக மட்டுமே இருக்க வேண்டும். தனி நீதிபதி தனது அதிகார வரம்பை மீறி உத்தரவு பிறப்பித்துள்ளார். மலை உச்சியில் உள்ள தூண் தீபத்தூண் அல்ல; ஒரு சாதாரண கல் தூண்தான். 175 ஆண்டுகளாக அங்கு தீபம் ஏற்றப்பட்டதாக எந்த பதிவும் இல்லை.
உச்சிப் பிள்ளையார் கோயிலில்தான் பல நூறு ஆண்டுகளாக தீபம் ஏற்றப்படுகிறது. கல் தூணில் கார்த்திகை தீபம் ஏற்றுவது நடைமுறைக்கு முரணானது; பாதுகாப்பு சிக்கல்களையும் உருவாக்கும்” என்று அவர் வாதிட்டார்.
இவ்வாறு, மலை உச்சி தூண் தீபத்தூண் அல்ல என்பதே கோவில் நிர்வாகம் மற்றும் அரசு தரப்பின் ஒருமித்த நிலைப்பாட்டாக நீதிமன்றத்தில் பதிவு செய்யப்பட்டது.
Summary :
The Tirupparankunram temple states the hilltop pillar is just granite, not a deepam column, adding there’s no proof of deepam lighting for 175 years.
