நீதிபதி சுவாமிநாதன் நீதித்துறை வரம்பை மீறி செயல்பட்டுள்ளார்

திருப்பரங்குன்றம் மலை உச்சியில் உள்ள தீபத் தூணில் தீபம் ஏற்ற வேண்டும் என்று உத்தரவிட்ட சென்னை உயர்நீதிமன்ற மதுரை கிளை தனி நீதிபதி ஜி.ஆர். சுவாமிநாதன் வழங்கிய தீர்ப்புக்கு எதிராக தாக்கல் செய்யப்பட்ட தமிழக அரசின் மேல்முறையீட்டு மனு, இன்று இரு நீதிபதிகள் அமர்வில் விசாரணைக்கு வந்தது.

இந்த விசாரணையில், நீதிபதி சுவாமிநாதன் நீதித்துறை வரம்பை மீறி செயல்பட்டுள்ளார்; அவரின் செயல் அதிகார மீறலாகும் என்று தமிழக அரசு வாதம் முன்வைத்தது.

கார்த்திகை தீபத் திருவிழாவை முன்னிட்டு, மலை உச்சியில் உள்ள தீபத் தூணில்தான் தீபம் ஏற்ற வேண்டும் என்று மதுரையைச் சேர்ந்த ராம ரவிக்குமார் வழக்கு தொடர்ந்தார். இந்த வழக்கை விசாரித்த நீதிபதி சுவாமிநாதன் நேரடியாக மலை உச்சிக்கு சென்று ஆய்வு செய்து, தீபம் ஏற்ற உத்தரவையும் பிறப்பித்தார்.

உத்தரவை முன்னிட்டு ஏற்பாடுகள் செய்யப்பட்டபோதிலும், சட்டம்–ஒழுங்கு பிரச்சனை காரணமாக போலீசார் அனுமதி மறுத்ததுடன், அப்பகுதியில் 144 தடை உத்தரவும் அமல்படுத்தப்பட்டது. இதையடுத்து பாஜக, இந்து முன்னணி அமைப்பினர் போராட்டத்தில் ஈடுபட்டு நிலைமை பதட்டமாகியது.

இந்த சூழலில், தனி நீதிபதி சுவாமிநாதனின் உத்தரவை ரத்து செய்ய வேண்டும் என்று தமிழக அரசு மேல்முறையீடு செய்தது. அதே மேல்முறையீட்டு மனு மீது இன்று இரு நீதிபதிகள் அமர்வு விசாரணை தொடங்கியது.

விசாரணையில் அரசு தரப்பு முன்வைத்த முக்கிய வாதங்கள்:

• “திருப்பரங்குன்றம் தீப விவகாரத்தில் நீதிபதி சுவாமிநாதன், விதிகளை மீறி நீதிமன்ற அவமதிப்பு மனுவை விசாரணைக்கு எடுத்துள்ளார்.”

• “அவரின் உத்தரவு காரணமாக சமூக நல்லிணக்கம், சட்டம் ஒழுங்கு பாதிக்கப்பட்டுள்ளது.”

• “அதிகார வரம்பை மீறி செயல்படுவது துரதிர்ஷ்டவசமானது; உத்தரவை ரத்து செய்ய வேண்டும்.”

• “விளக்கம் வழங்க எந்த அவகாசமும் தராமல் அவமதிப்பு வழக்கை எடுத்தது தவறு.”

• “ஒரே நாளில் வழக்கு எடுத்து தண்டனை வழங்க முடியாது; உத்தரவு நடைமுறையில் உள்ளதா என்பதையே விசாரிக்க முடியும்.”

மேலும், இந்து சமய அறநிலையத்துறை சார்பில்:

• “தீபத் தூண் 100 ஆண்டுகளாக பயன்படுத்தப்படவில்லை; இதை மனுதாரரும் நீதிபதியும் ஒப்புக்கொண்டுள்ளனர்.”

• “வழக்கு நிலுவையில் இருக்கும் நிலையில், உத்தரவு பிறந்த உடனே தீபம் ஏற்றுவது எப்படி சாத்தியம்?” என வாதம் முன்வைக்கப்பட்டது.

மனுதாரர் தரப்பு, “அறநிலையத்துறை நீதிபதியின் உத்தரவை செயல்படுத்தவில்லை” என்று கூறியபோது, அமர்ந்திருந்த நீதிபதிகள்:

• “மேல்முறையீட்டுக்கு 30 நாட்கள் அவகாசம் இருக்கும் நிலையில், ஏன் உடனடியாக நீதிமன்ற அவமதிப்பு மனு தாக்கல் செய்யப்பட்டது?” என்று கேள்வி எழுப்பினர்.

  Summary :

  TN govt argues in Madurai Bench that Justice Swaminathan exceeded authority in ordering Deepam atop Tirupparankundram hill; seeks to void the order.