0
0
விஜய் தலைமையில் நாளை த.வெ.க. மாவட்ட செயலாளர்கள் கூட்டம்
நடிகர் விஜய் தலைமையில் இயங்கும் தமிழக வெற்றிக் கழகம் அண்மையில் தனது இரண்டாவது ஆண்டு துவக்க விழாவைக் கொண்டாடியது. அப்போது, கட்சியின் அடிமட்ட அமைப்பான பூத் கமிட்டிகளை வலுப்படுத்த வேண்டியதன் அவசியத்தை விஜய் வலியுறுத்தினார்.
இதனைத் தொடர்ந்து, மாநிலக் கட்சிகளுக்கு நிகராக ஒவ்வொரு மாவட்டத்திலும் பூத் கமிட்டிகளை உருவாக்க த.வெ.க. தீவிரமாகத் திட்டமிட்டு வருகிறது. முன்னதாக, கட்சியின் நிர்வாக வசதிக்காக தமிழக வெற்றிக் கழகம் 120 மாவட்டங்களாகப் பிரிக்கப்பட்டுள்ளது.
இந்த மாவட்டங்களுக்கான பூத் கமிட்டிகளின் நிர்வாகிகளை நியமிக்கும் வேலைகள் தற்போது முழுவீச்சில் நடைபெற்று வருகின்றன.
இதற்கிடையில், சென்னையில் உள்ள பனையூரில் அமைந்திருக்கும் தமிழக வெற்றிக் கழகத்தின் (த.வெ.க.) தலைமை அலுவலகத்தில், கட்சியின் தலைவர் விஜய் தலைமையில் நாளை மாவட்ட செயலாளர்கள் கூட்டம் நடைபெற இருக்கிறது.
இந்த கூட்டத்தில் கட்சியின் மாவட்ட செயலாளர்கள் மற்றும் முக்கியமான நிர்வாகிகளுக்கு மட்டுமே அழைப்பு அனுப்பப்பட்டுள்ளது. மேலும், இந்த கூட்டத்தில் த.வெ.க. பொதுச்செயலாளர் ஆனந்த் மற்றும் தேர்தல் மேலாண்மை பிரிவு பொதுச்செயலாளர் ஆதவ் அர்ஜுனா ஆகியோரும் கலந்து கொள்ளவுள்ளனர்.
இந்த கூட்டத்தில் வாக்குச்சாவடி குழு நிர்வாகிகளை நியமிப்பது தொடர்பான முக்கியமான ஆலோசனை மேற்கொள்ளப்பட இருப்பதாக தகவல்கள் தெரிவிக்கின்றன.
